फुले

« फुले »

निळी, पिवळी, शुभ्र, लाल

मला आवडतात फुले फार

गुलाबाचा गंध, फारच गोड

वेणीत माळते दीदी रोज

कमळाचा बघा, वेगळाच थाट

तळ्यात पसरली खचुन दाट

चंपा-चमेली, प्राजक्त-लिली ताजी

दत्ताच्या फोटोला हार घाली आजी

प्रसन्न दरवळ, फुलतो मोगरा

आणतात पप्पा आईला गजरा

लालभडक लोबंतो जास्वंद फांदीवर

शोभुन दिसतो गणपतीच्या सोंडीवर

पिवळ्या धम्मक झेंडूचा मंगल हार

गुढी, दसरा-दिवाळीला सजवु दार

सुदंर, सुगंधी, रंगीत फुले

गोड, गोंडस आम्ही मुले

• रघुनाथ सोनटक्के

  तळेगाव, पुणे

  8805791905

दैनिक सामनाच्या 'उत्सव' पुरवणीत प्रकाशित

गणुदेव

« गणुदेव »

मला आवडतो गणुदेव फार

त्याच्या आगमनाची आतुरता अपार

रोज त्याच्यासाठी आणतो मी हार

आवडतात दुर्वा त्याला हिरव्यागार

आई बनविते लाडू अन् मोदक

आरतीसाठी घाई करतो मी रोजच

घर होतं मंगल पाहून तुझं रुप

बाप्पा तुझी सोंड आहे छान खुप

येतो वाजतगाजत होतो हर्षभर

वाट बघत असतो आम्ही वर्षभर

• रघुनाथ सोनटक्के

  तळेगाव, पुणे,  8805791905

८ सप्टेंबर २०२४ च्या दै. लोकसत्ता (लोकरंग) पुणे मधे प्रकाशित 

२५ सप्टेंबर २०१८ च्या दै. युवा छत्रपती 
१५ सप्टेंबर २०१८ च्या दै. पथदर्शी व
१८ सप्टेंबर २०१८ च्या सायबर क्राईममधे प्रकाशित 

                               

शाळेला जाऊ

 शाळेला जाऊ 

सुटी संपली पाऊस आला

शाळेला आता जाऊ चला

बाबा मला आणा बुट आणि ड्रेस

आवडतो मला शाळेचा गणवेश

पाटी दप्तर पाठीवर ओझी

त्रास देई आईला घाई माझी

शाळेला जाण्याची झाली मला घाई

बुकं आणि डबा भरून दे ना आई

लवकर मला शाळेत गं जायचे

मित्रांना मला आज जाऊन भेटायचे

शाळेतुन सुटल्यावर जाईन मी घरी

आई मला देईन छान छान खारी

• रघुनाथ सोनटक्के

8805791905

(दै. दिव्य-मराठीत प्रकाशित)

मनी म्याव

मनी म्याव

मनी म्याव मनी म्याव 

दिसते कशी छान 

लांब लांब मिश्या तुझ्या 

छोटे छोटे कान 

उंदराची वाट कशी 

बघते दबा धरून 

दुध पिते चुटचुट

डोळे बंद करून 

बोकोबा बाई तुझे 

रागीट गं भारी 

आले की ते तु 

जाते मागच्या दारी 

वाघाची तु मावशी 

आमची गं मनी 

लाड तुझे भारी 

करतो साऱ्याजणी 

बोल गडे तु 

सांग तुझे नाव 

आहे का बाई तुझे 

नाव मनी म्याव  

● रघुनाथ  सोनटक्के

दै. 'दिव्य मराठी' (23-May-2017)

वर्षाराणी

वर्षाराणी

सुसाट पळतो वारा 

गाणे गातो पानोपानी 

मासुंडल रान सारं 

आली आली वर्षाराणी 

पक्षी जाती घरट्याकडे 

गुरे धावती पायदानी 

गाऊ लागे कोकीळ 

होईल आता आबादानी 

लपे अनिल ढगांशी 

मेघांची लपाछपी चाले 

माथ्यावर इंद्रधनूची 

सप्तरंगी उधळण खुळे 

टपटपती थेंब टपोरे 

बरसती कधी धारा 

वर्षा तुझ्या आगमनाने 

बहरला आसमंत सारा 

बरसल्या तुझ्या राणी 

सारीमागून सरी 

हिरव्या शालुने सजली 

अवनी नववधूपरी 

सजली फुलांनी झाडे 

हिरवी हिरवी पाती 

येईल पुन्हा वर्षाराणी 

पक्षी गाणे गाती 

● रघुनाथ सोनटक्के 
8805791905
दैनिक सामनाच्या 'उत्सव' या रविवारीय पुरवणीत माझी प्रकाशित बालकविता

url : http://epaper.saamana.com/epaperimages//24092017//24092017-MD-HR-15.PDF

प्राण्यांची निवडणूक

प्राण्यांची निवडणूक 

रानात होती एकदा प्रमुखाची निवडणुक 

सर्व लागले कामाला कचरा केला साफसुफ 

लगेच भरली तिथे भलीमोठी सभा 

वाघोबा झाला अध्यक्ष पोपट होता उभा 

चिन्हासाठी झाला वाद वाघोबाचं होतं काय म्हणणं 

पुर्वीपासून पकड माझी पंजाच माझं चिन्हं 

हत्तीदादा झाले उभे म्हणे पाडतो मी भुरळ 

तलावाकाठी माझे राज्य द्यावे मला कमळ 

माकड म्हणे मला बरं झाड भेटले छान गड्या 

धुमाकूळ घातला त्यानं मारून फार उड्या 

कोल्हा होता अपक्ष खाल्ली त्याने मते 

लागत होते मागे त्याच्या मोठे-मोठे नेते 

प्रचाराला निघाले सकाळी पांढरे फसवे बगळे 

आश्वासन देऊन त्यांनी आपले केले सगळे 

ससे, हरणे सारे देत होते मते 

वाघ-कोल्हे एक-एकच फस्त करत होते 

 - रघुनाथ सोनटक्के 

(दै. दिव्य-मराठीत प्रकाशित)

गोगलगाय

गोगलगाय 

गोगलगाय गोगलगाय 

चालतेस हळू हळू 

थकत का नाहीस 

शंख ओढू ओढू

भारी होत असेल नाही 

तुला शंखाचे ओझे 

थांबत थांबत चालत जा 

दुखतील पाय तुझे 

चक्षु लांब करून 

बघत जा पुढे 

धोका असेल तर 

थांबत जा थोडे 

हात लावला कि तुला 

लाजतेस तू भारी 

ओढून घेते आत तुझी 

काय गोरी गोरी 

बागेत जाऊ आपण 

लपाछपी खेळू 

रोड झालीस बाई 

शंख ओढू ओढू 

नाव तुझं ठेवलं कुणी 

छान गोगलगाय 

तुझी माझी जोडी 

सांग जमेल काय 

रघुनाथ सोनटक्के 

8805791905

(दै. दिव्य-मराठीत प्रकाशित)

खारूताई

खारू ताई

खारी गं खारी
येशील का घरी
वाट पाहिन तुझी
मी झाडाखाली


खोडावरून उतरतेस
खाली भरभर
घेऊन जा मला
तुझ्या पाठिवर

मुंग्या, अळ्या
खातेस तु चवीनं
सावलीत छान छान
दिलं घर देवानं
         - रघुनाथ सोनटक्के
        8805791905
(पाणिनी मासिकाच्या सप्टेंबर २०१७ अंकात प्रकाशित)

सकाळ

सकाळ

  घराशेजारचा कोंबडा
देतो पहाटे बाग
आईची धामधुम
येतो मला जाग 

पुर्वेला उगवतो सुर्य
आकाशाच्या कपाळी
मंदिरात वाजे घंटा
ऐकू येई भूपाळी

पक्षांची किलबिल
चाले रानोमाळी
कोकीळ लावे सुर
गातो राघू सकाळी 

तुळशीला वाहे पाणी
आई माझी भोळी
मांगल्य असे घरात
दारी सडा, रांगोळी

घाली मला अंघोळ
देई आई थाळी
खाऊ खाण्यासाठी
उठतो मी सकाळी
- रघुनाथ सोनटक्के

(दै. सामना 'उत्सव' पुरवणीत  प्रकाशित)

चिऊताई

चिऊताईवर बालकविता, आवडल्यास लाईक आणि शेअर करा.

चिऊताई

येगं येगं चिऊताई अंगणात माझ्या
दाणे ने टिपून बाळाला तुझ्या

खाऊन घे काही काही चोचीत भर
येईल कुणी बाई चल घाई कर

इथे बघ, तिथे बघ सांडलेले दाणे
चिवचिव करत गाणे गा थोडे

घरट्यामध्ये तुझी पिल्ले हाका मारत असतील
चिऊ आई करत वाट बघत असतील

झाडाला टांगले मडके पाणी पीत जा
पिल्लांना तुझ्या दाणे नेत जा

येताजाता इथे गाणे गात जा
रोज माझ्या घरी अशीच येत जा

- रघुनाथ सोनटक्के