नाताळ

नाताळ
जिंगलबेल जिंगलबेल
आलाय सांताक्लाज
गिफ्ट देतो सगळ्यांना
मौज करू सारे आज

लाललाल टोपी त्याची
पांढरी दाढी, झब्बा
खांद्यावर पोतडी घेत
हाती चाॅकलेट डब्बा

चाॅकलेट सारे पाहून
सुटला माझा ताबा
हसतखेळत देतोय
सांताक्लाज बाबा

ख्रिसमस ट्री चमके
वाट पाहूया सगळे
नविन वर्ष येईल
आनंद घेऊन वेगळे

येसू जन्मला रात्री
दिवे लाऊया आज
जिंगलबेल जिंगलबेल
आलाय सांताक्लाज
• रघुनाथ सोनटक्के

दै. दिव्य मराठी (२५ डिसेंबर २०१९)  प्रीतीसंगम (२४ डिसेंबर २०१९) मधे प्रकाशित

रानफुल

रानफुल

पिवळं पिवळं
एक फुल फुललं
पहाटे सुर्यासंग
हळू बोललं

आपण पिवळे
मैत्री करू दोघे
सांग बरं तुझं
कसं चाललं?

फुलपाखरू एक
उडतउडत आलं
तुही रंगीत गड्या
छान जमलं!

थोड्या वेळाने
आली धुंद हवा
म्हणे चल खेळू
तिला बोललं!

सुर्य गेला मावळून
थोडं मलूल झालं
थकुनभागुन हळूच
झोपी चाललं!

• रघुनाथ सोनटक्के

साप्ताहिक सायबर क्राईम (२४ डिसेंबर २०१९) मधे प्रकाशित
२९ डिसेंबर २०१९ च्या  विदर्भ मतदारमधे प्रकाशित 

 
 

थंडी

थंडी
कुड कुड कुड
वाजे बघा थंडी
स्वेटर, टोपरं नी
घाला जाड बंडी

सकाळी सकाळी
धुक्याची चादर
शाळेला जायला
ऊठवते मदर

गरम शेकोटी
जाई धुर वर
आजोबा बसूया
चला लवकर

हात-पाय, डोके
पडले गार गार
उन्ह वाटे गोड
खावे फार फार

खारीक, लाडूंचा
खावुया खुराक
थंडीला पळवू
एकाच दमात
• रघुनाथ सोनटक्के

दै. युवा छत्रपतीमधे प्रकाशित
८ डिसेंबर २०१९ च्या मटा, झिपझैपझूम मधे प्रकाशित
 २९ डिसेंबर २०१९ च्या लोकसत्ता, बालमैफल मधे प्रकाशित

 

 

गणेशाचे आगमन

गणेशाचे आगमन

रूप त्याचे सुंदर
सोंड लांब सुरेख
आमच्या घरी आला
छोटा श्रीगणेश

मोदकांचे ताट
हाती हवे त्याला
ऐटीमधे बसून
चालवे मुषकाला

रोषनाई करून
सजवू त्याचे आसन
विद्येचा तो धनी
पाहून आम्हा हसण

सुखकर्ता-दुखहर्ता
सारेजण बोला
हाती त्याच्या शोभे
दुर्वा आणि भाला

तो आला घरी
असते आमची चंगळ
लाडका गणूदेव
आहे छान मंगल

• रघुनाथ सोनटक्के

दै. युवा छत्रपतीमधे प्रकाशित.  

https://youtu.be/b0jgqqHUg7U

सरीवर सरी

« सरसर सरी »
काळे काळे ढग, आले हो दाटून
बरसेल धो-धो, आभाळ फाटून

सरसर पडे, पावसाची सर
चिंबचिंब भिजे, सगळ्यांचं घर

गडगड ढग, तडतड विज
भूईच्या आतमधे, उगवेल बीज

टपटप थेंब, पावसाचे वाजती
पक्षाची चिवचिव, मोरही नाचती

सात रंगाने, नटले कसे अंबर
इंद्रधनू तो, दिसे बघा सुंदर

शाळेच्या अंगणी साचलं पाणी
भिजत गाऊ पावसाची गाणी

• रघुनाथ सोनटक्के

 १० सप्टेंबर २०१९ दै. दिव्य मराठीला प्रकाशित.  

 

माकडाचं सलून

 « माकडाचं सलून »

माकडानं टाकलं
मस्त एक सलून
बोर्ड लावला दराचं
आपलं नाव घालून

सगळ्यांना घाई
कुणी घेई मसाज
दाढी-कटींगचा दर
ठेवला रूपे पचास

अस्वल आले रांगत
म्हणे कापून दे केस
मालिश कर माझी
वाटेल मला फ्रेश

माकड मात्र त्याचे
केस कापून थकले
वाकून वाकून कमरेचे
हाड पुर्ण वाकले

फेशियल करायला
आला एक कावळा
फरक पडेना क्रिमने
लावून किती वेळा!

पिवळ्या अंगावर
पट्टे काळे काळे
घाबरतच केली वाघाची
मालिश बळे बळे

सिंहाला करायची होती
डाय आयाळीची
सवय होती त्याला
लाळ गाळायाची

कोल्हा आला मग
धावत हापतांना
वास येई तोंडाचा
केस कापतांना

हत्ती घुसला दुकानात
हळूच पाय घालून
बसता-बसता त्याने
टाकले दुकान तोडून

माकडाच्या दुकानाचा
प्रयत्न परत फसला
फुकट करून दाढी
कोल्हा गालात हसला
• रघुनाथ सोनटक्के

३० जूलै २०१९ दै. दिव्य मराठीमधे प्रकाशित
किशोरच्या जानेवारी २०१९ अंकात प्रकाशित

वाघोबा

वाघोबा

डरकाळी फोडली कि
होतात सारे गार
वाघोबांना सगळेच
प्राणी भीतात फार

पिवळ्या अंगावर
पट्टे काळे काळे
घाबरतच पळतात
सारे खडे खडे

वाघोबाची मिशी
बारीक पिळदार
दातांचे सुळेपण
दोन अणुकूचीदार

सारेच त्याच्यापुढे
घोळतात गोंडा
हरिण असो कि
मग हत्ती वा गेंडा

• रघुनाथ सोनटक्के

मो. ८८०५७९१९०५
२७ जूलै २०१९ दै. युवा छत्रपतीत, शब्दरसिक पानावर प्रकाशित
४ ऑगस्ट २०१९ च्या दै. लोकसत्ता, लोकरंग पुरवणी, बालमैफलमध्ये प्रकाशित.

 

स्वप्नात माझ्या

बालकविता

स्वप्नात माझ्या

स्वप्नात मी गेलो

आकाशातल्या घरी

तिथे भेटली मला

मैत्रिण माझी परी

चाॅकलेट, गोळ्यांचा

पाऊस तिथे पडायचा

आईस्क्रिमचा ढग

पांढराशुभ्र मिळायचा

कुल्फीच्या जंगलात

दिसेना कुठे धूप

पिझ्झाच्या फुलांतून

झरे चिज खुप

सायकल ना घोडा

उडत होतो हवेत

फिरवत होती परी

मला घेऊन कवेत

शुभ्र खडूचांदण्या

काळ्या नभाची पाटी

चंद्राची येई गाडी

मला फिरवायासाठी

छोटा भीम, डोरा

सगळेच तिथे हजर

करावी थोडी मस्ती

तर वाजला मग गजर

आईने दिली हाक

उठा शाळेला चला

स्वप्नातल्या दुनियेत

जायला आवडते मला 

• रघुनाथ सोनटक्के
११ मे २०१९ दै. युवा छत्रपती मधे प्रकाशित बालकविता.
१२ मे २०१९ दै. डहाणू मित्रमधे प्रकाशित

सरबताची शाळा

« सरबताची शाळा »

एकदा भरली सरबताची शाळा
उशीरा येतो म्हणे सुगंधी वाळा

लिंबू म्हणाले मी आंबट फार
सरबत बनवा मस्त गारे गार

कापून मधे मला जरा पिळा
नंतर पाण्यात साखर सोडा

कोकम म्हणाले भरा लाल ग्लास
पाहूण्यांना तुमच्या द्या खासम खास

सोलकढीताई बोले थोडी चव चाखा
वाटलं तर म्हणे थोडा मसाला टाका

मधेच बोलली ती शांत, थंड निरा
निघून जाईल तुमचा थकवा सारा

सर्वांना आवडतो मी मसाला ताक
जीर्‍या-मिठाची मला सोबत झ्याक

नारळपाण्याची असे ऐटच भारी
छाटून डोके अन् घुसवा नळी

सुट्यांमधे जर बसल्या उन्हाच्या झळा
भेट द्या आम्हाला हव्या तेवढ्या वेळा

• रघुनाथ सोनटक्के

मो. ८८०५७९१९०५ 

२० एप्रिल २०१९ दै. पुण्यनगरी
दै. लोकसत्ता, बालमैफल मधे प्रकाशित

 

 १७ एप्रिल २०२०, आदर्श महाराष्ट्र 

आंबे

बालकविता

« आंबे »

फळांचा राजा
कोण आहे सांगा
सर्वांचा आवडता
गोड गोड आंबा

हापूस, केशरी
काही पिकवायला
काहींचा आमरस
काही टिकवायला

हिरव्या-हिरव्या
कैर्‍या तोडा
पन्हं, लोणचं
चटण्या वाढा

गोड, पिवळे
निवडून घ्या
आमरस मस्त
बनवुन प्या

फिकून गेलीय
मामाची वाडी
सुटी घालवूया
मजेत थोडी

चाखून घ्या
गोड गोड फोडी
वर्षाने मिळेल
आंब्य‍ांची गोडी

    • रघुनाथ सोनटक्के
 २ जून २०१९ च्या दै. युवा छत्रपती (शब्दरसिक) मधे प्रकाशित
 ९ जून २०१९ दै. दिव्य-मराठी मधे प्रकाशित

 

होळी आली

बालकविता

«  होळी आली »

रंगाची दुनिया लयच भारी
होळी खेळूया मिळून सारी

वेगवेगळे रंग अंगावर टाकू
एकमेकांना चला प्रेमाने माखू

 हिरवा, लाल, पिवळा, करडा
कुणी बनेल बघा रंगीत सरडा

काळ्या रंगाने झाला गेंडा गण्या
चिंधीबाबा दिसतो कपड्यांत जुन्या

पाण्याचा फेकतो रंगीत फुगा 
लपून लावे मला देतोय दगा

होळी खेळायचे कृष्ण अन् राधा
प्रेमाची होतसे साऱ्यांना बाधा

जमा करू कचरा तुटकी लाकडे
झाडांच्या रक्षणास लक्ष तिकडे

सगंळ्यासोबत होळी खेळूया
रंगाने मैत्रीचे नाते जोडूया

 • रघुनाथ सोनटक्के
  २२ मार्च २०१९ च्या दै. मराठवाडा संचार मधे प्रकाशित

कोडं (भवरा)

बालकविता

« भवरा »

गिरक्या घेतो

भर भर भर

तोल जाईना

माझा लवकर

      बांधून सोडा

      जोरात शेंडी

      एक पाय अन्

      पोटाची हंडी

पृथ्वीसारखं

करतो मी भ्रमन

थांबून शेवटी 

आहे माझं नमन

       बसतो खिशात

       गप अन् गुमान

       मजा मी देतो  

       किती तुम्हा छान

घातलं तुम्हाला

मजेदार कोंडं

आठवा बरं माझं 

नाव काय थोडं

• रघुनाथ सोनटक्के

तळेगाव दाभाडे

१० फेब्रुवारी २०१९ च्या दै. बलशाली भारत मधे प्रकाशित 

आई मला शिकव

« आई मला शिकव »

आई मला शिकव 

भाजी कशी करतात 

वांग्याच्या भाजीला 

मसाला कसा भरतात 

जेवणाला तुझ्या हातच्या 

आहे फार गोडी 

बाबाही घेतात आणखी 

भाजी मागून थोडी 

पनीर-टीका खातो
आम्ही बोटे चाखून 
मटण, मशरूम ठेवतेस
माझ्यासाठी राखून

पोळ्या कश्या होतात 

मस्त नरम-नरम

खायला मजा येते 

त्या गरम-गरम

कारल्याची भाजीही 

लागत नाही कडू 

चिंच, गुळ घालून

कि करते तू जादू 

मऊ गरम भात 

आणि आमटीचं सार 

मधे मधे प्यायला  

येते मजा फार 

हात तुझा चालतो 

जसं आहे इंजन 

पाहुण्यांसाठी बनवते 

किती सारे व्यंजन 

चिरून, धुवून भाज्या 

ठेवते तू आधीच 

मला नाही सांगत 

का बरं कधीच 

तडका आणि शिरा 

शिकव मला आधी 

मदत तुला करायची 

सांगते मला आजी 

उगीच तुला सारे 

म्हणतात का गं सुगरण 

चल मला शिकव

स्वयंपाकचं व्याकरण

  • रघुनाथ सोनटक्के

१७ जानेवारी २०१९ च्या दै. डहाणू मित्र मधे प्रकाशित 
११ जानेवारी २०१९ च्या दै. बलशाली भारत मधे प्रकाशित